fiction - basta pakla an iya keychain
Basta Pakla
an Iya Keychain
by Kyla Estoya
Monthsary naliwat nira Reyna ngan Aidan. Ika-32? Diri ako maaram
ano it ira punto pag-ihap kada bulan—gabay nala nira gin-anniversary. Sure
naman ada hira nga hira na. Pero sabagay, riko man hira nga duha. Kada bulan
mayda regalo. Kada bulan dapat bongga. Tanan nga tawo didi ha campus, bisan mga
maestro ngan maestra, maaram hiton ira monthsary. Kulang nala i-declare hiya
nga holiday.
“Hagi waray forever! Pero tungod ha ira, matuod na talaga ako,”
siring ni Perla. Classmate ko. Die-hard fan nira Reyna ngan Aidan.
“Magbubulag gihap iton,” it akon baton.
Nasiring hi Perla bitter
kuno ako kay nagseselos la ako ha ira nga duha.
Tuod.
Maiha na kami magkilala ni Aidan. Han elementary, kami pirmi iton
nag-uupod. Magsapit ngani kami hadto han balay. Yana diri na kay bumalhin hira
ha Abucay. Namatay man gud an iya Mama, sanglit didto nala hiya ginpaukoy ha
paryente hit iya papa nga seaman. Pinaura
hiya didto asya naka-eskwela hiya a private school. Didto niya nakilala ito nga
Reyna.
Kada monthsary, mayda nira theme. Yana kay an ira theme animals. Maaram ako kay ginsigngan ako
ni Perla. Nabatian kuno niya hi Reyna ngan han iya sangkay ha may CR,
nag-paplano kun ano it ireregalo kan Aidan. Nabatian gihap niya iton ‘surprise’
ni Reyna kan Aidan kay mapasyada kuno hira hiton gab-e hiton ira monthsary. Nasiring
hi Perla cute daw it ira relasyon.
Kun ako it papakianhon, puro man la ito pamarayaw.
Nadiri ako kan Reyna kay para ha akon diri hira angay ni Aidan.
Maarte, Englishera, ngan napakahin-o. Pareho kami hin kurso ngan naaringit ako
basta nakikit-an ko hiya. Fake. Klaro.
Damo liwat iton nauuwat.
“Buotan ka talaga, Reyna!” Asya pirmi tak nababatian ha ira nga
tanan. Buotan nim mata. Diri ba hira
maaram magbasa hin tawo? Mga buta. Klaro man gud nga diri hya maupay nga tawo.
Napakabuotan gad la ito hiya kay para umayon ha iya it mga tawo—para umayon hi
Aidan ha iya.
Han una kada enrollment, pwede kami pumili hin bisan ano nga
schedule bisan pa iba nga kurso tam upod. Maupay ko adto nga mga adlaw kay
kaurugan ha akon mga subjects, classmate kami ni Aidan. Nagkokopyahay pa ngani
kami han amon mga assignments. Pero danay masumo la kay pirme hi Reyna it
nagawas ha iya baba.
“Mahilig hiya hin pakla. Diri ako maaram kun kay ano.”
Diri
gihap ako maaram, Aidan ngan waray ko labot.
Yana nga sem, tanan nga amun klase nagtitikang alas siete hit aga.
Diri na kami nakakapili tam schedule kay puro major naman tam subject sanglit
pirmi ko yana classmate hi Reyna. Kaurogan pa gud ha amun klase kay ‘alphabetical
order’ iton seating arrangement tapos aada hiya tak hirani. Nasulod na ngani
hiya ha classroom, guba na tak adlaw. It iya pahamot, mabaho. It iya ngirit,
maraksot. It iya boses, maalingogngog.
“Good morning guys! My mom baked cookies last night so nagdara ako
para ha iyo tanan,” an iya siring, “But remember share-share la ha?”
Diri urusahon nga damo iton uruwaton, kumuha hira tanan hiton nga
cookies. Pati hi Perla.
“Marasa baya.”
“Saho.”
Diri maiha umabot na an amun maestra. Nag-announce hiya bahin hit
amon finals. Usa nala kuno iton kulang nga dapat i-discuss, ngan bangin diri na
kuno kami mag-klase next week. “But before we start our lesson, we have a guest
for today,” nasiring hi Mam.
Kumita kami ha tanan ha purtahan. Di maiha sumulod hi Aidan nga
mayda dara nga flowers, balloon, ngan regalo. Tanan nga akon mga classmates ginkikilig.
Sige an ira guliat ngan ira ginkikinitaan hi Reyna nga namumula. Dumaop hi
Aidan kun hain nalingkod hi Reyna: “Happy Monthsary, babe”, ngan iya ginhatag
an iya mga halad. Gin-abri ni Reyna an iya regalo. An sulod? Keychain nga stuff
toy hin pakla. Sunod hadto, nagpasalamat hi Aidan ha amon maestra, ngan gumawas
na hiya. Ginpadayon na nam klase pero klaro nga usa la it aada ha hunahuna
hiton mga tawo: hi Reyna.
Bug-os nga adlaw asya la nak nababatian nga yawyaw. Maupay nala
mayda kami mga school paper meeting kada kulop, ngan maupay nala waray ini
labot hi Reyna. Tak hunahuna nakakaphuway. Pero tungod han nahitabo kanina,
maaringasa la gihap nak utok. Kay ano ba kasi hira nag uyab? Kay ano kailangan
pa ni Aidan bumalhin hin balay? Kay ano pa namatay an iya mama? Kun waray hiya
namatay, diri unta hira uyab—bangin kami lugod an magkakadayon! Mas angay man
kami ni Aidan. Ano ba an iya nakikit-an kan Reyna? Mas mahusay man ako, mas
baltok!
Matuok-tuok.
###
Nagab-ihan ako ha amun school paper office. Didto ako nagbuhat han
akon mga homework kay maluya it signal hit WiFi ha balay. Nagsarit naman ako
nam adviser, ngan sumige hiya basta uupayon ko la pag-lock hit purtahan. Pag-gawas ko ha campus, sakto la mayda multicab
nga umagi. Sumakay ako.
Bisan puno an akon ginsakyan, nakakaabat la gihap ako hin hagkot.
Mahangin ha gawas. Gusto ko na kumaturog. Pag-abot namon ha may Apitong,
humunong an multicab. Tanan nga pasahero nagduda kun ano an nahitabo. May mga
police ngan damo nga tawo an nagtatampo ha unahan. Mayda dumaop nga tanod ha
amon sarakyan ngan iya ginsigngan an amun drayber nga mayda kuno naligis hin
motor ngan namatay. Ginhuhulat la kuno nira iton ambulance nga umabot para kuhaon iton iya lawas.
“Hala ano ba iton! Bata pa?”, pakiana han drayber.
“Bata pa. Daraga,” siring han tanod, “Waray pa gud ID. Basta pakla
an iya keychain.”
Yawa kaupay
ReplyDeleteWhy thank you!
Delete